Poet
ra.igani hi ra.igani thi
kya kahani miri kahani thi
ik to raaja ghazab ka ziddi tha
phir vo raani bhi qaisarani thi
vo bhi teri dulhan ko pahna di
jo anguThi tiri nishani thi
kitne daav chala.e duniya ne
par vo laḌki baḌi siyani thi
ek chhoTa sa ghar nahin tha vo
shah-zadi ki rajdhani thi
vo jo dil men sama nahin paa.i
ek til men kahan samani thi
phir se ik yaad ke ta.aqub men
aankh kal shaam paani paani thi
mera banta tha jaan se jaana
us ki ankhon men bad-gumani thi
daan kar di zamin-zadon ko
vo mohabbat jo asmani thi
chaa.e piina to ik bahana tha
aarzu dil ki tarjumani thi
vo mohabbat kahan thi ‘iman’ ji
ik musibat thi na-gahani thi
Leave a Reply