sukun ye apne saveron ka chain rainon ka
koi hisab nahin hai ḳhuda ki denon ka
makan kachche the va.ade the pakke dil raushan
zamana tha vo charaghon ka lalTenon ka
ye sach hai gaanv ki raten ḳhamosh hoti hain
magar vo shor guzarti hui trainon ka
gale ka haar saliben hain sab dikhave ki
yahan rivaj hai ab to tila.i chainon ka
halak hoti hai maḳhluq aur ḳhudaon par
koi asar hi nahin shevanon ka bainon ka
vahan musha.ere paḌhne chali ho tum ‘parvin’
jahan hai zor laTaon ka tansenon ka
Leave a Reply