Makhdoom Mohiuddin
daraz hai shab-e-gham soz-o-saz saath rahe
musafiro mai-e-mina-gudaz saath rahe
qadam qadam pe andheron ka samna hai yahan
safar kaThin hai dam-e-sho.ala-saz saath rahe
ye koh kya hai ye dasht-e-alam-faza kya hai
jo ik tiri nigah-e-dil-navaz saath rahe
koi rahe na rahe ek aah ik aansu
ba-sad ḳhulus ba-sad imtiyaz saath rahe
ye mai-kada hai nahin sair-e-dair sair-e-haram
nazar-afif dil-e-pak-baz saath rahe
Leave a Reply