ta-abad ek hi charcha hoga
koi ham sa koi tum sa hoga
isi tarik zamin ka manzar
chand par chandni jaisa hoga
suraj aaya hai miri samt magar
dusri samt andhera hoga
kaash pahle se koi batla de
kis tarah zikr hamara hoga
aise begana na sunna logo
ye bhi afsana kisi ka hoga
vo nahin aa.ega is mahfil men
duur hi duur se sunta hoga
aa.i be-saḳhta har sher pe daad
kitne ma.ani nahin samjha hoga
kaun tha jis ne rakhi tujh se ummid
haan to vo shaḳhs mujhi sa hoga
kaun tha abr jo ban kar barsa
haan to vo tujh ko tarasta hoga
kaun tha jis se hui tai manzil
haan to pahle vo bhaTakta hoga
kaun tha jis se ye sho.ale bhaḌke
haan to vo ḳhuub sulagta hoga
tum raho chup ki ghazal-ḳhvan ‘ali’
na bura hoga na achchha hoga
Leave a Reply