Subhan Asad
is ka gham hai ki mujhe vahm hua hai shayad
koi pahlu men mire jaag raha hai shayad
jagte jagte pichhli ka.i raten guzri
chand hona miri qismat men likha hai shayad
dauḌ ja.un har ik aahaT pe kivaḌon ki taraf
aur phir ḳhud ko hi samjha.un hava hai shayad
us ki baton se vo ab phuul nahin jhaḌte hain
us ke honTon pe abhi mera gila hai shayad
us ko kholun to rag-e-dil ko koi Dasta hai
yaad ki gaThri men ik saanp chhupa hai shayad
mujh ko har raah ujalon se bhari milti hai
ye un ankhon ke charaghon ki dua hai shayad
Leave a Reply