Rahbar Jaunpuri
qalam ḳhamosh hai alfaz ki tasir bole hai
hamari safha-e-qirtas par tahrir bole hai
ḳhudara ab mujhe azad kar do qaid-e-paiham se
machal kar paanv men lipTi hui zanjir bole hai
ajab me.amar hain jin ki samajh men ye nahin aata
imarat kitni mustahkam hai ḳhud ta.amir bole hai
yahi mahsus hota hai ajanta ki guphaon men
ki har tasvir to chup hai fan-e-tasvir bole hai
haqiqat miT nahin sakti badal dene se tariḳhen
har ik fan men hamara husn-e-alam-gir bole hai
karishma ye nahin to aur kya hai ḳhun-e-nahaq ka
hamari be-gunahi par yahan shamshir bole hai
ḳhuda bande se kya puchhe vahan us ki raza ‘rahbar’
hatheli ki lakiron men jahan taqdir bole hai
Leave a Reply