saman sad hazar hain tu jaag to sahi
sab vaqf-e-intizar hain tu jaag to sahi
ghafil nazar uTha ki vo asar-e-sub.h-e-nau
gardun pe ashkar hain tu jaag to sahi
auqat teri quvvat-e-bazu pe munhasir
lamhat sazgar hain tu jaag to sahi
tera yaqin tera amal tere valvale
hasti ka e’tibar hain tu jaag to sahi
o mahv-e-ḳhvab dida-e-bina ke vaste
ḳhud jalve be-qarar hain tu jaag to sahi
be-barg be-libas daraḳhton ki Tahniyan
paigham-e-nau-bahar hain tu jaag to sahi
‘aḳhtar’-ziya.i niind ke maton ke shahr men
kuchh log hoshiyar hain tu jaag to sahi
Leave a Reply