kyuun tiri qand-labi ḳhush-suḳhani yaad aa.i
zahar-afshani-e-dunya-e-dani yaad aa.i
pa.e-gul-gasht-e-chaman phir dil-e-divana chala
phir tiri sarv-qadi gul-badani yaad aa.i
jab kisi jism pe sajte hue dekha hai libas
teri ḳhush-qamati ḳhush-pairahni yaad aa.i
yuun nibaha tira vaada tire gham ne barson
gham-e-ayyam ki paiman-shikani yaad aa.i
jaam uThate hi dil umDa to bhar aa.iin ankhen
chashm-e-saqi tiri saghar-shikni yaad aa.i
yaad aa.i na kabhi be-sar-o-samani men
dekh kar ghar ko gharib-ul-vatani yaad aa.i
aaj dikhlate gul-afshani-e-guftar ‘vahid’
lag ga.i chup jo vo ghuncha-dahni yaad aa.i
Leave a Reply