har ek phuul ke daman men ḳhaar kaisa hai
bata.e kaun ki rang-e-bahar kaisa hai
vo samne the to dil ko sukun na tha hasil
chale ga.e hain to ab be-qarar kaisa hai
yaqin tha ki na aa.ega mujh se milne koi
to phir ye dil ko mire intizar kaisa hai
agar kisi ne tumhara bhi dil nahin toḌa
to ansuon ka ravan abshar kaisa hai
mujhe ḳhabar hai ki hai be-vafa bhi zalim bhi
magar vafa ka tiri e’tibar kaisa hai
tire makan ki divar par jo hai chaspan
talash kis ki hai ye ishtihar kaisa hai
ye kis ke ḳhuun se hai daman-e-chaman rangin
ye surḳh phuul sar-e-shaḳh-dar kaisa hai
ab un ki barq-e-nazar ko dikhao a.ina
vo puchhte hain dil-e-be-qarar kaisa hai
miri ḳhabar to kisi ko nahin magar ‘aḳhtar’
zamana apne liye hoshiyar kaisa hai
Leave a Reply