Shauq Qidvai
abru hai ka.aba aaj se ye naam rakh diya
ham ne uTha ke taaq pe islam rakh diya
nashshe men ja gira jo main masjid men sar ke bal
zahid ne mujh pe sajde ka ilzam rakh diya
jhichka vo ḳhauf kha ke to main ne taḌap ke ḳhud
barchhi ki nok par dil-e-nakam rakh diya
dilchasp naam sun ke lage mangne hasin
kis ne zara se ḳhuun ka dil naam rakh diya
itni to us ne ki miri dil-soziyon ki qadr
turbat pe ik charagh sar-e-sham rakh diya
juuḌa jo bandh gaya to na.e dil kahan phansen
tu ne idhar lapeT ke kyuun daam rakh diya
aankh is ada se us ne dikha.i ki main ne ‘shauq’
chupke se apna mai ka bhara jaam rakh diya
Leave a Reply