Inaam Azmi
tasavvurat men vo zoom kar raha tha mujhe
bahut shadid tavajjoh ka samna tha mujhe
chamak raha tha main suraj ke misl is liye dost
kahin pe ja ke andhere men Dubna tha mujhe
mujhe vahan se udasi bula rahi thi aaj
jahan se sham-o-sahar koi dekhta tha mujhe
phir us ko ja ke batana paḌa ghalat hai ye
samajhne vaale ne kya kya samajh rakha tha mujhe
guzar na paaya tha jo ‘jaun-elia’ se bhi
tumhare ba.ad vo lamha guzarna tha mujhe
lahuluhan hue ja rahe the har manzar
kisi ne vaqt ke mathe pe yuun likha tha mujhe
main apni niind agar TuTne nahin deta
us ek ḳhvab se har vaqt TuTna tha mujhe
Leave a Reply