Hai Aaj Andhera Har Jaanib Aur Nur Ki Baaten Karte Hain

hai aaj andhera har janib aur nuur ki baten karte hain

nazdik ki baton se ḳha.if ham duur ki baten karte hain

ta.amir-o-taraqqi vaale hain kahiye bhi to un ko kya kahiye

jo shish-mahal men baiThe hue mazdur ki baten karte hain

ye log vahi hain jo kal tak tanzim-e-chaman ke dushman the

ab aaj hamare munh par ye dastur ki baten karte hain

ik bhaa.i ko duuje bhaa.i se laḌne ka jo dete hain paigham

vo log na jaane phir kaise jamhur ki baten karte hain

ik ḳhvab ki vaadi hai jis men rahte hain hamesha kho.e hue

dharti pe nahin hain jin ke qadam vo tuur ki baten karte hain

ham ko ye gila mahbub unhen afsana-e-bazm-e-aish-o-tarab

shikva ye unhen ham un se dil-e-ranjur ki baten karte hain

kya ḳhuub ada hai un ki ‘obaid’ andaz-e-karam hai kitna hasin

majbur ke haq se na-vaqif majbur ki baten karte hain