shab-e-hijr yuun dil ko bahla rahe hain
ki din bhar ki biiti ko dohra rahe hain
mire dil ke TukḌe kiye ja rahe hain
mohabbat ki tashrih farma rahe hain
mira dard ja hi nahin sakta tauba
ḳhuda.i ke da.ave kiye ja rahe hain
hansi aane ki baat hai hans raha huun
mujhe log divana farma rahe hain
ajab shai hai soz-o-gudaz-e-mohabbat
ki dil jalne men bhi maze aa rahe hain
usi bevafa paas phir kuchh umiden
liye ja rahi hain chale ja rahe hain
ziden tauba tauba haTen allah allah
hamin hain jo is dil ko bahla rahe hain
miri raat kyuun kar kaTegi ilahi
mujhe din ko taare nazar aa rahe hain
na aghaz ulfat ka achchha tha ‘manzar’
na anjam achchhe nazar aa rahe hain
Leave a Reply