Ahmad Javed
maujud hain kitne hi tujh se bhi hasin kar ke
jhutla diya ankhon ko main dil pe yaqin kar ke
jis chashm se rindon men hu-haq hai usi ne to
zahid ko bhi rakkha hai mehrab-nashin kar ke
kya us ki latafat ka ahval bayan kijiye
jo dil pe hua zahir ankhon ko nahin kar ke
kuchh kam tha bala-e-jan pe chehra ki uupar se
ankhen bhi bana laae gharat-gar-e-din kar ke
aine ke aage se ab uth bhi chuko sahab
kya kijiyega khud ko itna bhi hasin kar ke
sau daagh hain siine men vo dagh-e-judai bhi
dekho to zara hoga un men hi kahin kar ke
is dil ka to naqsha hi duniya ne badal daala
kuchh yaad hai rahta tha vo bhi to yahin kar ke
‘javed’ vahan tak to mushkil hai koi pahunche
mangvaiye qasid bhi jibril-e-amin kar ke
Leave a Reply