kaun kahta hai ki nafrat ko sada di jaa.e
aao bas dil men vafa aur baḌha di jaa.e
ham-safar lutf-e-safar aur do-bala hoga
chhanv men dhuup agar thoḌi mila di jaa.e
ab to vahshat miri chahat ki yahi kahti hai
main gunahgar huun to mujh ko saza di jaa.e
abr ḳhushiyon ke bhi barsenge yaqin hai mujh ko
gham ki chadar to mire sar se haTa di jaa.e
main ne asrar aziyyat men hi khulte dekhe
baat chhoTi hai magar sab ko bata di jaa.e
umr phir us ki asiri men guzarun ‘jyoti’
phir se mujh ko vahi azad faza di jaa.e
Leave a Reply