main chup raha ki zahr yahi mujh ko raas tha
vo sang-e-lafz phenk ke kitna udaas tha
aksar miri qaba pe hansi aa ga.i jise
kal mil gaya to vo bhi darida-libas tha
main DhunDhta tha duur ḳhalaon men ek jism
chehron ka ik hujum mire as-pas tha
tum ḳhush the pattharon ko ḳhuda jaan ke magar
mujh ko yaqin hai vo tumhara qayas tha
baḳhsha hai jis ne ruuh ko zaḳhmon ka pairahan
‘mohsin’ vo shaḳhs kitna tabi.at-shanas tha
Leave a Reply