ham ko shab-e-visal bhi ranj-o-mehan hua
qismat khilaf-e-taba hua jo sukhan hua
phir aane ki havas men sahar kis khushi ke saath
hamrah-e-nala dard-e-jigar bhi maan hua
gardish bhi us ke kuche men hai aur qarar bhi
qismat to dekhiye ki safar men vatan hua
qatil ada-e-shukr ko ya shikvon ke liye
jo zakhm jism par hua goya dahan hua
sabit-qadam hua na rah-e-ishq men koi
majnun koi hua to koi kohkan hua
kuchh mujh se shab ko ghair ke izhar ke liye
ye ishq-bazi ki thi ki apna ye fan hua
dushman se aur hotin bahut baten pyaar ki
shukr-e-khuda ye hai ki vo but kam-sukhan hua
lab par hansi vo aai vo chin-e-jabin gai
kahta to huun khata hui divana-pan hua
aina dekh dekh ke kya dekhte ho tum
chhuna bhi yaan nasib tumhara badan hua
ab bosa dene men tumhen kis baat ka hai uzr
gaali ke dene se hamen sabit dahan hua
haq baat to ye hai ki usi but ke vaste
zahid koi hua to koi barhaman hua
taqdir ki ye baat hai ab kya kare koi
raazi hue vo bose pe to gum dahan hua
phir mere iztirab men kyuun shak hai aap ko
ulfat ka jab yaqin tumhen ai jan-e-man hua
lab tak na aaya harf-e-tamanna kabhi ‘nizam’
goya mira sukhan bhi tumhara dahan hua