Haal-E-Bedari Mein Rah Kar Bhi Main KHwabon Mein Raha

Syed Mohammad Askari Arif

hal-e-bedari men rah kar bhi main ḳhvabon men raha

jaise pyasa koi ik umr sarabon men raha

miri ḳhushbu se mo.attar tha gulistan-e-vafa

ḳhaar manind mira yaar gulabon men raha

guftugu tak rahi mahdud mulaqat apni

mira mahbub shab-e-vasl hijabon men raha

ab mujhe ḳhak-nashini ka sharaf hasil hai

ye alag baat hai kal tak main navabon men raha

pyaar hi pyaar tha tahrir mire ḳhat men magar

juz shikayat nahin kuchh us ke javabon men raha

main ne har haal men parvaz ka sikha hai hunar

kaT ga.e par mire phir bhi main uqabon men raha

ishq sabit hua nuqsan ka sauda ‘arif’

sirf ghaTa hi mohabbat ke hisabon men raha