aziim munsif!!
hamari qismat ki har adalat ka faisla hai
ki apni be-hurmati ki farman le ke jaaen
to apna koi gavah laaen
gavah
rishton ke mohtaram kundliyon men baithe
sanpoliyon ka
gavah aisi haveliyon ka
ki jin men qanun paaon dharne se kapkapae
kunvari chikhen
bilak bilak ke sadaen karti
in hi andheron men duub jaaen
magar vo is be basi ka apni
na ek koi gavah paaen
kahan se laaen
gavah in bhediyon ka
jo apni shahvaton par
ibadaton ki muqaddas-o-mohtaram ebaen
sajae baithe hon taak men
saundhe kachche jismon ke
jin ke bajron ke uud men
siskiyan sulagti hon raat ko
aur din tilavat ke lahn se
jagmagae jaaen
ye mohtaram bhediye
ham un ki khabasaton ka gavah laaen
kahan se laaen
hamen koi aisa moajaza de
ki gungi andhi siyah shab ko
gavahiyon ka hunar sikhaen
khabir hai to
basir hai to
tu janta hai
ki aaj tak maut ke alava
koi na apna gavah paaya
hamin pe tutin qayamaten bhi
hamin ne zillat ka baar uthaya
kitab-e-insaf ke musannif
tire sahife to kah rahe hain
ki saare insan zi-sharaf hain
fahim hain
balighun-nazar hain
sab apni apni kitab ki ru se apne baare men ba-khabar hain
to phir hamare hi pusht par haath kyuun bandhe hain
hamari hi sab gavahiyon par ye be-yaqini ki mohr kyuun hai
sabhi sahifon men ye likha hai
tire tarazu ka
koi palda jhuka nahin hai
to kya ye samjhen
hamara koi khuda nahin hai
Leave a Reply