ḳhafa mat ho mujh ko Thikane bahut hain
mira sar rahe astane bahut hain
bahut duur hai apne nazdik tu bhi
tujhe yaad kafir bahane bahut hain
bahane na kar mujh se ai chashm-e-giryan
abhi ashk mujh ko bahane bahut hain
mire chashm-o-dil aur jigar sab hain hazir
tu ḳhatir-nishan rakh nishane bahut hain
kashish dil ki hi kaam karti hai varna
fusun sainkadon hain fasane bahut hain
junun naqd-e-dagh-e-jigar mangta hai
ye kah do ki ab to ḳhazane bahut hain
bahut kam hai sach is zamane men ‘ehsan’
yahan jhuuT ke kar-ḳhane bahut hain