pankhuḌi koi gulistan se saba kya laa.i
duur tak nik.hat-e-gul ḳhaak uḌati aa.i
uf vo begana nigahon ki karam-farma.i
fitrat-e-ishq ba-andaz-e-junun tharra.i
taaza taaza vo shikast-e-suḳhan-e-ra.ana.i
chup hue vo to tabassum ki jhalak si aa.i
aḳhir-e-shab vo sitaron ki sarakti hui chhanv
main vahin baiTh gaya raat jahan lahra.i
jaagi jaagi hui palken vo ba-aghosh-e-jamal
dil ko aram ziyada tha to kam niind aa.i
vaqt ne zarf-e-nazar ko lab-e-mai-ḳhvar kiya
tishnagi shishe ko paimana bana kar laa.i
zindagi ek hujum-e-guzaran hai lekin
aadmi apni jagah alam-e-sad-tanha.i
apne hi sho.la-e-rangin se jala daman-e-gul
apni hi shaḳh-e-tabassum pe kali murjha.i
manzil-e-aql junun rang use milti hai
jis ne ik baar rah-e-ishq men Thokar khaa.i
patte patte ka nahin gulshan-e-alam men javab
zarre zarre men dhaḌakta hai dil-e-yakta.i
TuTti si rag-e-dauran ye taraqqi ki thakan
kisi ma.ashuq-e-sahar-ḳhez ki nim-angḌa.i
ḳhaak aur ḳhuun se ik sham.a jala.i hai ‘nushur’
maut se ham ne bhi sikhi hai hayat-ara.i
Leave a Reply