ḳhair us se na sahi ḳhud se vafa kar Daalo
vaqt ab kam hai bahut yad-e-ḳhuda kar Daalo
ek surat hai yahi paanv jame rahne ki
haath uThao dil-e-sabit ki dua kar Daalo
harf-e-inkar bhi us dar se baḌi ne.amat hai
ye faqiron ke hain asrar sada kar Daalo
aur duniya men bahut kuchh hai gulistan ki tarah
sair tum bhi kabhi ham-rah-e-saba kar Daalo
habs hota hai ajab dil men tire gham ke baghair
ji ulajhta hai kuchh is tarah ki kya kar Daalo
umr bhar aa.egi hathon se gulabon ki mahak
ḳhar-zaron ka safar barhana-pa kar Daalo
ye malamat na suno dil ki shab-o-roz ‘suhail’
jaan hi ka to ziyan hoga vafa kar Daalo
Leave a Reply