lakhon ki bhiiḌ men bhi koi ham-nafas na ho
allah teri ḳhalq ka matlab qafas na ho
rang-e-jamal-e-ishq se kunachi bhari ho par
tasvir khinchne ke liye canvas na ho
kahiye ki kaise dil lage aisi jagah jahan
baten to be-hisab hon baton men ras na ho
main ishq kar raha huun magar sochta bhi huun
pichhle baras jo ho chuka ab ke baras na ho
hairat hai ek umr ki barish ke bavajud
ankhon men koi shakl hai jo Tas se mas na ho
‘mishra’ ji aise shaḳhs se rahte hain dur-dur
jis men ki rang-e-ishq ho rang-e-havas na ho
Leave a Reply