Rahman Hafeez
phir jo kaTti nahin us raat se ḳhauf aata hai
so hamen sham-e-mulaqat se ḳhauf aata hai
mujh ko hi phunk na Dalen kahin ye lafz mire
ab to apne hi kamalat se ḳhauf aata hai
kaT hi jaata hai safar sahl ho ya mushkil ho
phir bhi har baar shuruat se ḳhauf aata hai
vahm ki gard men lipTe hain saval aur hamen
kabhi naf.i kabhi isbat se ḳhauf aata hai
aise Thahre hue mahaul men ‘rahman’-hafiz
in guzarte hue lamhat se ḳhauf aata hai
Leave a Reply