huuk uThti hai mire qalb ki gahra.i men
us ki yaad aati hai jab raat ki tanha.i men
ab to do vaqt ki roTi bhi nahin milti hai
zindagi kaise kaTegi miri mahnga.i men
aaj aaya vo mire ghar to ye mahsus hua
mahtab utra ho jaise miri angna.i men
meri ankhon se nikal aa.e ḳhushi ke aansu
beTi ruḳhsat jo hui gunjti shahna.i men
ghar men mehman agar aa.en to ḳhushi hoti hai
main kasar kuchh nahin rakhta huun pazira.i men
na to roTi hi mayassar hai na kapḌa na makan
zindagi yuun bhi guzar jaati hai kaThina.i men
husn aisa hai ki a.ine ko hairan kar de
ik vafa ki hi kami hai mire harja.i men
kaise ash.ar men la.ega ghazal ki ḳhushbu
vo jo masruf hai bas qafiya paima.i men
daḳhila mera hi mamnua hai gulshan men ‘zaki’
jab ki ḳhuun main ne diya baagh ki zeba.i men
ai ‘zaki’ main ne bhi ye ḳhvah nahin samjha tha
un ki sazish rahi shamil miri paspa.i men
Leave a Reply