Naseer Parwaz
qadam qadam asman bhi misl-e-zamin hai mujh ko
ye ka.enat-e-nigah bait-e-yaqin hai mujh ko
libas ban kar jo roz-o-shab ke badan pe jaaga
vo zindagi ka vajud hi dil-nashin hai mujh ko
nigah phere jo ḳhud-numa.i mere yaqin se
to phir bata.un hayat kitni hasin hai mujh ko
mujhe ḳhabar hai ki meri qismat men tu likha hai
koi guman-e-ghalat bhi ḳhud par nahin hai mujh ko
na jaane kyon har nazar se us ko bachana chahun
vo aarzu jo har ek shai se hasin hai mujh ko
jahan labon ka vajud hai buund buund tishna
vo shahr-e-fikr-o-nazar dayar-e-hazin hai mujh ko
baja ki mere badan pe harf-e-ana likha hai
tiri zarurat bhi zindagi men kahin hai mujh ko
harif ‘parvaz’ jis jagah hai mira sarapa
sukun-e-dil iztirab-e-paiham vahin hai mujh ko
Leave a Reply