Kisi Kashish Ke Kisi Silsile Ka Hona Tha

kisi kashish ke kisi silsile ka hona tha

hamen bhi aḳhirash ik daere ka hona tha

abhi se achchha hua raat so gai varna

kabhi to ḳhatm-e-safar ratjage ka hona tha

barhana-tan badi guzri thi zindagi apni

libas ham ko hi ik dusre ka hona tha

ham apna dida-e-bina pahan ke nikle the

sadak ke biich kisi hadse ka hona tha

hamare paanv se lipti hui qayamat thi

qadam qadam pe kisi zalzale ka hona tha

ham apne samne har lamha marte rahte the

hamare dil men kisi maqbare ka hona tha

tamam raat bulata raha hai ik taara

ufuq ke paar kisi moajaze ka hona tha

kisi ke samne utthi nazar to bah nikla

hamari aankh men kya aable ka hona tha

hisar-e-shahr se bahar nikal hi aae hain

kabhi hamen bhi kisi raste ka hona tha

Leave a Comment