jo mujh men chhupa mera gala ghont raha hai
ya vo koi iblis hai ya mera khuda hai
jab sar men nahin ishq to chehre pe chamak hai
ye nakhl khizan aai to shadab hua hai
kya mera ziyan hai jo muqabil tire aa jaun
ye amr to maalum ki tu mujh se bada hai
main banda-o-nachar ki sairab na ho paun
ai zahir-o-maujud mira jism dua hai
haan us ke taaqub se mire dil men hai inkar
vo shakhs kisi ko na milega na mila hai
kyuun nur-e-abad dil men guzar kar nahin paata
siine ki siyahi se naya harf likha hai