Shuja Khaavar
paar utarne ke liye to ḳhair bilkul chahiye
biich dariya Dubna bhi ho to ik pul chahiye
fikr to apni bahut hai bas taghazzul chahiye
nala-e-bulbul ko goya ḳhanda-e-gul chahiye
shaḳhsiyat men apni vo pahli si gahra.i nahin
phir tiri janib se thoḌa sa taghaful chahiye
jin ko qudarat hai taḳhayyul par unhen dikhta nahin
jin ki anhken Thiik hain un ko taḳhayyul chahiye
roz hamdardi jatane ke liye aate hain log
maut ke ba.ad ab hamen jiina na bilkul chahiye
Leave a Reply