kya bata.en us ke bin kaise zindagi kar li
dhaḌkanen to zinda hain dil ne ḳhud-kushi kar li
main use samajhne ke marhalon men uljha tha
us ne jaane chupke se kaise dosti kar li
doston main andha huun ye ḳhushi bhi kam hai kya
us ne meri ankhon se ghar men raushni kar li
niind mangte phirne men ana ka sauda tha
is ana men ḳhvabon se ham ne dushmani kar li
zo.am aur ana ka ham aur kya gala ghoTen
us ka har kaha maana baat jo kahi kar li
us ke chhoḌ jaane par kuchh na kuchh to karna tha
kuchh na kar sake aḳhir ham ne sha.iri kar li
Leave a Reply