Khumar Barabankavi
tu chahiye na teri vafa chahiye mujhe
kuchh bhi na tere gham ke siva chahiye mujhe
marne se pahle shakl hi ik baar dekh luun
ai maut zindagi ka pata chahiye mujhe
ya rab muaaf kar ke na de karb-e-infial
main ne khataen ki hain saza chahiye mujhe
khamoshi-e-hayat se ukta gaya huun main
ab chahe dil hi tuute sada chahiye mujhe
un mast mast ankhon men aansu are ghazab
ye ishq hai to qahr-e-khuda chahiye mujhe
naseh nasihaton ka zamana guzar gaya
ab pyare sirf teri dua chahiye mujhe
har dard ko dava ki zarurat hai ai ‘khumar’
jo dard khud ho apni dava chahiye mujhe
Leave a Reply