raqs-e-junun ki garmi-e-tasir dekhna
khulta hai kaise halqa-e-zanjir dekhna
ghis ghis ke pattharon ko banaya hai aa.ina
dekhen vo ḳhvab ham ko hai ta.abir dekhna
harbe sab un ke un ko hi lauTa diye ga.e
hairat se ban ga.e hain vo tasvir dekhna
likh di zaban-e-zaḳhm men rudad-e-zindagi
jismon pe us ki shoḳhi-e-tahrir dekhna
ab to vajud-e-maqtal-o-zindan pe aa bani
ab beḌiyan na tauq na zanjir dekhna
dekhe hain baiThe baiThe muqaddar ke tum ne khel
uTh kar zara karishma-e-tadbir dekhna
qasr-e-hayat-e-nau ki hai barud par bina
‘anjum’ ye pa.edari-e-ta.amir dekhna
Leave a Reply