Aazadi

Ali Sardar Jafri

puchhta hai to ki kab aur kis tarah aati huun main

god men nakamiyon ke parvarish paati huun main

sirf vo makhsus siine hain miri aram-gah

aarzu ki tarah rah jaati hai jin men ghut ke aah

ahl-e-gham ke saath un ka dard-o-gham sahti huun main

kanpte honton pe ban kar bad-dua rahti huun main

raqs karti hain isharon par mire maut-o-hayat

dekhti rahti huun main har-vaqt nabz-e-kaenat

khud-farebi badh ke jab banti hai ehsas-e-shuur

jab javan hota hai ahl-e-zar ke tevar men ghurur

muflisi se karte hain jab adamiyat ko juda

jab lahu piite hain tahzib-o-tamaddun ke khuda

bhuut ban kar nachta hai sar pe jab qaumi vaqar

le ke mazhab ki sipar aata hai jab sarmaya-dar

raste jab band hote hain duaon ke liye

aadmi ladta hai jab jhute khudaon ke liye

zindagi insan ki kar deta hai jab insan haram

jab use qanun-e-fitrat ka ata hota hai naam

ahrman phirta hai jab apna dahan khole hue

asman se maut jab aati hai par tole hue

jab kisanon ki nigahon se tapakta hai hiras

phutne lagti hai jab mazdur ke zakhmon se yaas

sabr-e-ayyubi ka jab labrez hota hai subu

soz-e-gham se khaulta hai jab ghulamon ka lahu

ghasibon se badh ke jab karta hai haq apna saval

jab nazar aata hai mazlumon ke chehron par jalal

tafraqa padta hai jab duniya men nasl-o-rang ka

le ke main aati huun parcham inqilab-o-jang ka

haan magar jab tuut jaati hai havadis ki kamand

jab kuchal deta hai har shai ko baghavat ka samand

jab nigal leta hai tufan badh ke kashti nuuh ki

ghut ke jab insan men rah jaati hai azmat ruuh ki

duur ho jaati hai jab mazduron ke dil ki jalan

jab tabassum ban ke honton par simatti hai thakan

jab ubharta hai ufuq se zindagi ka aftab

jab nikharta hai lahu ki aag men tap kar shabab

nasl qaumiyyat kalisa saltanat tahzib-o-rang

raund chukti hai jab in sab ko javani ki umang

subh ke zarrin tabassum men ayaan hoti huun main

rifat-e-arsh-e-barin se par-fishan hoti huun main