adeel-zaidi

Usko Jab Ki Mere Anjam Se Kuchh Kaam Nahin

us ko jab ki mire anjam se kuchh kaam nahin

mujh ko bhi ishq ke iqdam se kuchh kaam nahin

jazba-e-ishq na pahuncha saka jab main us tak

mujh ko ab nama-o-paigham se kuchh kaam nahin

ghar men jis ke liye rahta tha vahi ab na raha

ab mujhe ghar ke dar-o-bam se kuchh kaam nahin

muntazir rahti thi har shaam tiri qurbat ki

tu nahin jab to mujhe shaam se kuchh kaam nahin

ilm ka jaam dar-e-ilm se milta hai mujhe

mujh ko to aur kisi jaam se kuchh kaam nahin

More Poems

Leave a Comment