Saghar Siddiqui
zaḳhm-e-dil par bahar dekha hai
kya ajab lala-zar dekha hai
jin ke daman men kuchh nahin hota
un ke sinon men pyaar dekha hai
ḳhaak uḌti hai teri galiyon men
zindagi ka vaqar dekha hai
tishnagi hai sadaf ke honTon par
gul ka siina figar dekha hai
saqiya! ehtimam-e-bada kar
vaqt ko sogvar dekha hai
jazba-e-gham ki ḳhair ho ‘saghar’
hasraton par nikhar dekha hai
Leave a Reply