hayat-o-maut ka ik silsila hai
mohabbat intiha tak ibtida hai
main kya janun ki bab-e-tauba kya hai
abhi to mai-kade ka dar khula hai
zara phir dil pe nazren Daal diije
charagh-e-arzu ḳhamosh sa hai
ata kar di tumhari aarzu ne
vo ik duniya jo duniya se juda hai
hasin hon laakh duniya ke manazir
vo kya dekhe jo tum ko dekhta hai
nazar ke saath nazzara bhi gum hai
dil-e-muztar ye kis ka samna hai
mire dil ko na rakh be-rang saaqi
ki har saghar gulabi ho raha hai
na dozaḳh hai na jannat hai to ‘basit’
mire a.amal-e-gham ka kya sila hai
Leave a Reply