miri zindagi ka ye haal tha yahi shakl-e-rah-ravi rahi
ki na gham ka gham hi raha kabhi na ḳhushi ki mujh ko ḳhushi rahi
na vo parda-dar hai raaz men na kisi ki parda-dari rahi
jo paḌe the parde sab uTh ga.e magar ab bhi jalvagari rahi
shab-e-hijr guzri hai kis tarah tumhen kya suna.un ye majra
main ajal ke saa.e men tha khaḌa miri sar pe maut khaḌi rahi
tiri yaad men bahut hila-ju yunhi guzre sham-o-sahar mire
kabhi din men aah se kaam tha kabhi shab men nauhagari rahi
na kisi ke dushman-e-jan hue na kisi ko dushman-e-jan kiya
yahi baat thi ki jo ghair se bhi hamesha apni bani rahi
miri hasraten mire hausle sab hi jal ke ḳhaak men mil ga.e
ye kisi ki di hui aag thi jo lagi to dil men lagi rahi
vo ghaTa ka zor kahan gaya shab-e-mah kya hui saqiya
ki na lutf-e-bazm-e-surur hai na bahar-e-bada-kashi rahi
ye navazishen tiri baghban ki kahin ka main nahin rah gaya
na vo ranj-e-daur-e-ḳhizan raha na vo fasl-e-gul ki ḳhushi rahi
miri be-kasi se jahan men na hua bhi kuchh to bahut hua
vahi bebasi to rahi magar tiri yaad dil men basi rahi
ye saval kyuun ye ḳhayal kya hai vafa to is ka ma.aal kya
yahi zikr vird-e-zaban raha yahi fikr dil ko lagi rahi
na mujhi ko apna pata mila na tujhi ko DhunDh ke pa saka
na miri ḳhabar na tiri ḳhabar ajiib ek be-ḳhabari rahi
ye maqam-e-shukr hai be-guman raha ḳhush hi ‘ḳhushtar’-e-ḳhush-bayan
na ata vajud men thi kasar na karam ki us ke kami rahi
Leave a Reply