Jafar Raza
ham apne-ap se karte rahe bayan tanha
tumhari bazm men baiThe kahan kahan tanha
taghayyurat ke aaseb men vajud mira
ujaaḌ ban men ho jaise koi makan tanha
ye soz-o-saz ka paikar ye haDDiyon ka nagar
jo aag paa.e to chaTḳhe uThe dhuan
kahin kisi ki siyasat na rang laa.i ho
bhare chaman men hai kyuun aaj baghban tanha
ye bar-e-ishq jise asman uTha na saka
uTha.e phirta raha huun main na-tavan tanha
tumhare aane ki aahaT to kab se sunta huun
chale bhi aao mire paas mehrban tanha
hamin harif rahe aur hamin halif hue
hamare ba.ad hua mir-e-karvan tanha
vahi to dushman-e-jan hai usi se kaise bachen
vo ek shaḳhs jo aaya tha kal yahan tanha
yahi zamin tamaddun ki razdar rahi
yahi zamin ugalti rahi dhuan tanha
Leave a Reply