Poet
aaj a.ina jo dekha kitni hairani hui
ajnabi aa.i nazar ik shakl pahchani hui
jab ye jaana vaqt-e-mushkil koi bhi sathi nahin
dil ko rahat si mili mahsus asani hui
ham samajhte the ki be-ghar be-sahara hain magar
asman ne ek chadar ham pe thi taani hui
ansuon pe hansne vaalo kya tumhen malum hai
aag jo dil men thi aa kar aankh men paani hui
saath le kar ḳhushiyan apne zindagi phir aa ga.i
ham ne apne dil men thi kuchh aur hi Thani hui
ham bhi is lamhe se ḳha.if the bahut ḳha.if ai dost
ham se mil kar tum ko bhi yaksar pareshani hui
raste ki mushkilen ‘tasir’ kya pur-lutf thiin
haan magar manzil par aa kar kuchh pareshani hui
Leave a Reply