Khwab Girwi Rakh diye Aankhon Ka Sauda Kar diya

Fatima Hasan

khvab girvi rakh diye ankhon ka sauda kar diya

qarz-e-dil kya qarz-e-jan bhi aaj chukta kar diya

ghair ko ilzam kyuun den dost se shikva nahin

apne hi hathon kiya jo kuchh bhi jaisa kar diya

kuchh khabar bhi ho na paai is dayar-e-ishq men

kaun yusuf ho gaya kis ko zulekha kar diya

dil ke darvaze pe yaden shor jab banne lagin

dhadkanon ka naam de kar bojh halka kar diya

kitne achchhe log the kya raunaqen thiin un ke saath

jin ki rukhsat ne hamara shahr suuna kar diya

apne pyaron ko bachaya dard ki har mauj se

aankh men sailab roka dil ko dariya kar diya

phul, paude, ped, bachche ghar ka angan aur tum

khvahishon ke naam par in sab ko yakja kar diya

gham nahin la-hasili ka ishq ka hasil hai ye

ai hisab-e-zindagi tujh ko to puura kar diya

hijr se hijrat talak har dukh se samjhauta kiya

bhiid men rah ke bhi main ne khud ko tanha kar diya

ye zamin ‘hasrat’ ki hai is par qadam rakkha to phir

itni jurat ho gai arz-e-tamanna kar diya