Muztar Khairabadi
ham umr ke saath hain safar men
baiThe hue ja rahe hain ghar men
ham luT ga.e teri rahguzar men
ye ek hui hai umr-bhar men
ab kaun raha ki jis ko dekhun
ik tu tha so aa gaya nazar men
hasrat ko mila hai ḳhana-e-dil
taqdir khuli gharib ghar men
ankhen na churao dil men rah kar
chori na karo ḳhuda ke ghar men
ab vasl ki raat ho chuki ḳhatm
lo chhup raho daman-e-sahar men
main aap hi un se bolta huun
baiTha huun zaban-e-nama-bar men
‘muztar’ karo dil hi dil men shikve
rah ja.egi baat ghar ki ghar men
Leave a Reply