Poet
dard paaya hai to ik dard ashna bhi chahiye
pattharon ke is nagar men aa.ina bhi chahiye
jis ki mahfil men suna.i diin qayamat ke huruf
ek aisa paikar-e-saut-o-sada bhi chahiye
main to vo insan huun jis ki vafa se hai gharaz
ba.az logon ko magar dad-e-vafa bhi chahiye
ḳhak-dan par zulm hai bechargi hai ḳhauf hai
charḳh par ik malik-e-arz-o-saman bhi chahiye
in dinon yuun to hai sab ko sang ho jaane ka shauq
a.ina-ḳhane men rahne ki jagah bhi chahiye
rut badalne se nahin ‘bedi’ kisi ko bhi gharaz
sab ko lekin kuchh alag ab-o-hava bhi chahiye
Leave a Reply