hanste hue man-bap ki gaali nahin khate
bachche hain to kyuun shauq se mitti nahin khate
tum se nahin milne ka irada to hai lekin
tum se na milenge ye qasam bhi nahin khate
so jaate hain fōtpath pe akhbar bichha kar
mazdur kabhi niind ki goli nahin khate
bachche bhi gharibi ko samajhne lage shayad
ab jaag bhi jaate hain to sahari nahin khate
davat to badi chiiz hai ham jaise qalandar
har ek ke paison ki dava bhi nahin khate
allah gharibon ka madad-gar hai ‘rana’
ham logon ke bachche kabhi sardi nahin khate
Leave a Reply