Etibar Sajid
kisi ko ham se hain chand shikve kisi ko behad shikayaten hain
hamare hisse men sirf apni safaiyan hain vazahaten hain
qadam qadam par badal rahe hain musafiron ki talab ke raste
havaon jaisi mohabbaten hain sadaon jaisi rifaqaten hain
kisi ka maqruz main nahin par mire gareban pe haath sab ke
koi miri chahaton ka dushman kisi ko darkar chahaten hain
tiri judai ke kitne suraj ufuq pe duube magar abhi tak
khalish hai siine men pahle din si lahu main vaisi hi vahshaten hain
miri mohabbat ke raz-dan ne ye kah ke lauta diya mira khat
ki bhigi bhigi si ansuon men tamam gunjalak ibaraten hain
main dusron ki khushi ki khatir ghubar ban kar bikhar gaya huun
magar kisi ne ye haq na maana ki meri bhi kuchh zaruraten hain
Leave a Reply