mardan-ali-khan-rana

Wo Masiha Qabr Par Aata Raha

vo masiha qabr par aata raha

main mue par rose ji jaata raha

zindagi ki ham ne mar-mar ke basar

vo but-e-tarsa jo tarsata raha

vaah bakht-e-na-rasa dekha tujhe

nama-bar se khat kahin jaata raha

raah takte takte akhir jaan gai

vo taghaful-kesh bas aata raha

dil to dene ko diya par ham-nashin

haath main mal mal ke pachhtata raha

dekh us ko ho gaya main be-khabar

dil yakayak haath se jaata raha

kya kahun kis tarah furqat men jiya

khun-e-dil piita to gham khata raha

raat bhar us barq-vash ki yaad men

sail-e-ashk ankhon se barsata raha

DhunDhta phirta huun us ko ja-ba-ja

dil khuda jaane kidhar jaata raha

us masiha ki umid-e-vasl men

shaam jiita subh mar jaata raha

ishq ka ‘raana’ maraz hai la-dava

kab suna tu ne ki vo jaata raha

More Poems

Leave a Comment