Fatima Hasan
vafa-sarisht huun duuri men bhi mohabbat hai
akele rahne men lekin baḌi aziyyat hai
ye jagti hai to phir der tak jagati hai
mire vajud men soi hui jo vahshat hai
jahan pe ishq ki sarhad junun se milti hai
vahan pe aa ke mile vo agar mohabbat hai
bahut hain ḳhvab magar ḳhvab hi se kya hoga
hamare biich jo haa.il hai vo haqiqat hai
vo daur aaya ki vo bhi gharon ko chhoḌ ga.e
jo sochte the ki ab mustaqil sukunat hai
samajh rahi thi main apne qayam ko manzil
ḳhabar nahin thi ki aage bhi ek hijrat hai
bahut se log dilon men chhupa.e baiThe hain
ye ‘fatima’ hi nahin hai jise shikayat hai
Leave a Reply