Poet
aarzu hai na koi hasrat hai
yaad hi us ki ab ghanimat hai
gham ki daulat hi meri daulat hai
is men bhi mujh ko ain rahat hai
dekhiye kaun kamran nikle
main huun ya ab meri musibat hai
kyon pasheman ho dil gunahon par
us ki baḳhshish hai us ki rahmat hai
us se kya ho mujhe umid-e-vafa
bevafa.i hi jis ki aadat hai
gham men masrur dard men shadan
dil ki fitrat ajiib fitrat hai
har zaban par hai ab hamara naam
ai mohabbat tiri inayat hai
ho chuki intiha jafaon ki
ab tire lutf ki zarurat hai
gulistanon ka hai maqam apna
ḳharzaron ki apni azmat hai
gham na ho to hai zindagi be-kaif
gham hi se zindagi ibarat hai
din baharon ke bhi na raas aa.e
mere ḳhaliq ye meri qismat hai
shorishen ḳhatm hain shabab ke saath
ab vo dil hai na vo tabi.at hai
maut se log kyon hirasan hain
zindagi bhi to ik musibat hai
koi begana ho ki apna ho
har kisi se hamen mohabbat hai
gham se bezar kis liye ho ‘kanval’
gham hi se aadmi ki izzat hai
Leave a Reply