jurm-e-hasti ki saza kyuun nahin dete mujh ko
log jiine ki dua kyuun nahin dete mujh ko
sarsar-e-ḳhun ke tasavvur se larazte kyuun ho
ḳhak-e-sahra huun uḌa kyuun nahin dete mujh ko
kyuun takalluf hai mire naam pe taziron ka
main bura huun to bhala kyuun nahin dete mujh ko
ab tumhare liye ḳhud apna tamashai huun
dosto dad-e-vafa kyuun nahin dete mujh ko
main musafir hi sahi raat ki ḳhamoshi ka
tum sahar ho to sada kyuun nahin dete mujh ko
jins-e-bazar ki surat huun jahan main ‘aḳhtar’
log shishon men saja kyuun nahin dete mujh ko
Leave a Reply