ye kar-e-be-samran mujh se hone vaala nahin
main zindagi ko bahut der Dhone vaala nahin
main sat.h-e-ab pe ik tairta hua lasha
mujhe koi bhi samundar Dubone vaala nahin
baḌe jatan se mila hai ye apna aap mujhe
main ab kisi ke liye ḳhud ko khone vaala nahin
fasil-e-shahr tira aḳhiri muhafiz huun
ye shahr jaage na jaage main sone vaala nahin
vo ek tu ki tire gham men ik jahan ro.e
vo ek main ki mira koi rone vaala nahin
kisi ko phuul na de pa.un main agar ‘shahbaz’
kisi ki ruuh men kanTe chubhone vaala nahin
Leave a Reply