jo kahta hai ki dariya dekh aaya
ghalat mausam men sahra dekh aaya
Dagar aur manzilen to ek si thiin
vo phir mujh se juda kya dekh aaya
har ik manzar ke pas-e-manzar the itne
bahut kuchh be-irada dekh aaya
kisi ko ḳhaak de kar aa raha huun
zamin ka asal chehra dekh aaya
ruka mahfil men itni der tak main
ujalon ka buḌhapa dekh aaya
tasalli ab hui kuchh dil ko mere
tiri galiyon ko suuna dekh aaya
tamasha.i men jaan aTki hui thi
palaT kar phir kinara dekh aaya
bahut gadla tha paani is nadi ka
magar main apna chehra dekh aaya
main is hairat men shamil huun to kaise
na jaane vo kahan kya dekh aaya
vo manzar da.imi itna hasin tha
ki main hi kuchh ziyada dekh aaya
Leave a Reply